نشاطات الاجازة

نشاطات الاجازة

الاجازة محتاجة اننا نستخدمها في حاجات كتير ما بنقدرش نعملها ايام المذاكرة الامتحانات فلازم نخطط لها صح

أولا: لازم نخطط لفسح العيلة يعني بابا وماما والابناء وبس ويبقى فيها ترفيه وانبساط ونتجنب فيها الخناقات والانتقادات والتوجيهات، كل حاجة لازم تكون بالمعقول، حتى الدلع

ثانيا: لازم ننمي العقل بشوية ألعاب جماعية تشترك فيها أفراد الأسرة ولو حتى ساعة كل يوم أو يومين، طيب زي ايه؟

– بازل اكيد, العاب الكوتشينة, الدومينو, فيه لعبة حلوة قوي وكلها ذكاء اسمها ايمكاب, ماستر مايند, كل ألعاب الفك والتركيب بتشغل المخ جدا

بس تشغيل المخ؟ لأ طبعا فيه كمان ألعاب للشخصية والانفعالات، بس دي بقي محتاجة خيال عظيم. احنا لازم ندرب اولادنا على التعبير عن غضبهم وفرحهم، طيب ازاي؟ اكيد مش بالسؤال ولا اننا نقرره لكن بالاسلوب غير المباشر:

هاتوا ورق ابيض وعلقوه على الحيط، وادوا لأولادكم اقلام وقولولهم يعملوا اي حاجة على الورقة يعملوا اللي حساين بيه لو حسوا بشخبطة يشخبطوا ولو بزعل يعبروا عنه في الورقة ولو بغيرة او بفرحة، اي حاجة ولو سألوكم قولولهم يعملوا اي حاجة حتى لو رسم خط، و مش هم بس انتم كمان هاتعملوا زيهم ويتعلق الورق على الحيط لمدة اسبوع (ممكن يكون ورق كانسون كبير ابيض

آخر الاسبوع افردوا الورق في جلسة عائلية جميلة وطويلة وكل واحد يقول احساسه بنفسه وبغيره لكن برضه من غير نقد ولا تعليق…. ممنوع نهائيا اعطاء الرأي. احنا محتاجين نسمع اولادنا من غير ما نحكم عليهم، اسمعوهم وهم هايسمعوكم (ما انتم برضه هاتكونوا عبرتم) وهاتلاقوا حاجات جديدة هاتكتشفوها فيكم وفيهم

كمان مهم قوي نشترك لاولادنا في انشطة خارجية زي المعسكرات والرحلات والكشافة والمراكز اللي بتعمل أنشطه ليها أهداف زي مركز دايما اصحاب وغيره

برضه مهم اننا نسيبهم براحتهم شوية لكن مش كل الاجازة بس من حقهم احيانا يصحوا متأخر أو يكسلوا يوم وخصوصا في سن المراهقة وما قبل المراهقة